السلام عليكم ورحمة الله وبركاته
يقول بطل قصة الخطوبة :
حبيت أحكي لكم اليوم عن خطوبتي وبالتحديد أول يوم رحت أشوف فيه خطيبتي
طبعاً البنت راقية و سنويا تطلع مع أهلها إجازة استجمام في سويسرا
وأهلها أغنياء جداً ما شاء الله لكن فيهم تواضع جميل
وما ينظرون للمظهر بقدر ما ينظرون للجوهر وهذا اللي خلاني أتجرأ
وأخطب بنتهم ,, ووافقوا الحمد الله لأسباب أمنية !!
المهم جاء اليوم المهبب بالنسبة لي واللي هو يوم شوفة البنت
طبعا أنا آخر بنت شفتها هي بوسي أيام التلفزيون ألأسود والأبيض بعدها أنقطع البث التلفزيوني عن حارتنا
وصار مافيه صور ترمز للأنوثة في مخيلتي غير أمي وخواتي الله يحفظهم والباقي شنبات
المهم أنا مو متعود أشوف بنت قدامي بدون عباية أو حتى مطلعة عيونها
كيف عاد إذا شفت بنت لابسة فستان من باتشي وتسلم علي طبعا أكيد راح اهبب وفعلا هذا اللي صار
الوالدة الله يحفظها عارفتني .. الذوق بدولة وأنا بدولة
عشان كذا كانت هي وخواتي كل الليل يعلموني الإتكيت وفن التعامل مع الآخرين .. وكيف أحكي مع البنت الذوق
طبعا كنت متكشخ على الآخر ,, لدرجة العطر استعملت علبة كاملة حتى الجزم الله يعزكم عطرتها
المهم رحت لهم البيت وقبل ما أوصل بيتهم وقفت عند محطة وشلت الحذاء ولبست جزمة أعزكم الله
( كنت مخبيهم آخر شيء لأنهم جدد وما أبغاها تتوسخ والبنت ما شافتني لابسهم )
طبعا اكتشفت أن الجزمة اللي أنا لابسها ضيقة بشكل لا يطاق بس أيش أسوي أختي موصيتني تقول لازم تلبسها ما أبغاهم يشوفوا
أصابعك الي زي الفطر والله ما فيهم شيء حلوين بس هي دقيقة بزيادة
المهم لبستهم ودخلت بوابة القصر بالسيارة ودعست على ( ورد ) ما دريت أحسبه أسفلت طلع مسطحات خضراء ..
وقفت السيارة ونزلت ومشيت للباب الداخلي للبيت واللي يشوفني وأنا امشي يقول هذا أكيد عنده أعاقة أو يعاني من عاهة أبدية
( طبعا بسبب الجزمة ضيقة مرة ومو قادر أمشي والله بس قلت يالله كلها كم خطوة وأفسخها )
استقبلني أبوها عند الباب الداخلي للقصر ورحب فيني أشد ترحيب وأصر علي أني أدخل جوات البيت بالجزمة أعزكم الله ..
وقال هم يسوو كذا لأن .. وأرضية البيت رخام زي الحرم
طبعا دخلت للبيت وأمري لله مجبراً أخاك لا بطل ولما وصلت نهاية المجلس
كأن الدم محبوس في سيقاني ومتجمع في الركب ورجولي ناشفة ما فيها دم !!
طبعا قدموا لي الشاي والقهوة وكان الشاي تبعهم مررر بشكل لا يطاق ( أختي تقول السكر تلاقيه مكعبات في علبة كريستال !! )
المهم بعدها قالي أبوها أنت مستعد أبغى أنادي البنت ..
قلت لا والله ما تناديها أجلس يا رجال خلني اسمع علومك 'طبعا أنا مرره مستحي وأبي أتهرب '
قال أنت جاي تخطب ولا تسلم قلت طيب لازم أشوفها عادي ما عندكم نمونة ( أختها الصغيرة مثلا )
قال .. لا ما أبغاك تقول ما شفتها قلت أستحي قال عادي بجلس معك ( قلت بقلبي توي ما أستحي صدق )
قام ونادها ,, أنا كنت جالس أتأمل في رجولي من الحياء ما أسمع إلا كعب البنت
وكأن مع كل طقة للكعب 10 طقات لقلبي ,, لين جلست قريبة كان قلبي شوي ويوقف
قالت : السلام عليكم
أنا ارتبكت ورديت عليها وقلت : السلام عليكم !!
طبعا أنا من هنا بديت أهبب لأني أشوف سراب فستان بنت على الأرض جالسة قدامي وأنا أتأمل برجولي من الحياء !!
قام أبوها قال لي تكلم معها عشان تقدرون تشوفون بعض
قلت : أأأأأ
أأأأأأأأأأأأأأ
أأأأأأم م م م م م م م كح كح
ثم سكت !!
قال اسألها طيب
قلت بسرعة : ما عندي أسئلة ولا شروط والله !! ههههههههههه
قال طيب أسألها وين تدرس قلت عارف سنة ثانية في الجامعة
قال اسأليه أنتي ..
ما ردت عليه وكانت مرة مستحية
قام قال يالله اسأليه عشان يشوفك
طبعا أنا في ها الأثناء جاني ضعف حاد في حاسة السمع
قامت سألتني أنت : مدرس ؟
قلت لا أنا مدرس ( أحسبها تقول أنت تدرس )
ابتسمت ونزلت رأسها
قالها أبوها ارفعي راسك يالله واسأليه ,, استحت في البداية بعدين
قالت: كم عمرك ؟
قلت 8 آلاف !!
( أحسبها تقول كم راتبك )
هنا أبوها مات ضحك ,,وهي كمان ضحكت شوي وهي مستحية طبعا أنا ما ادري وش السالفة !!
بعدها كانت بتقوم لكن أبوها أجبرها تجلس ,, لأنها كانت مرة مستحية وكاتمة ضحكتها
بعدها قالها يالله كملي ..
قالت : متى أنت متخرج ؟
قلت في الإجازة الجاية أو زي ما تحبون ( أحسبها تقول متى تبغى نتزوج )
طبعا هنا انفجر أبوها من الضحك ,, والبنت صارت تضحك واستحت وقامت تركض ودخلت البيت
طبعا أنا قلت أكيد شكلي فيه شيء غلط !
( قلت يمكن عقالي يضحك زي كل مره " أقصد مفتوح " أو فيه صرصار رايح جاي على راسي بس قلت لااا بيتهم قصر وأكيد ما فيه صراصير )
لما خلص أبوها ضحك قال لي هاه أعجبتك البنت ؟
كان نفسي أقول حلوة بس أخاف يذبحني ,, قلت له برسلك ردي على الجوال ..!
ثم أستاذنت وطلعت وأنا مدري ليه يضحكون !! لين هي علمتني ليه ..!
بس بجد يا ناس مجلسهم ما شاء الله كبير ومترامي الأطراف لدرجة
انو المسافة اللي بيني وبين طاولة الشاي تقريبا مساحة ثلاجة !!
7
7
لوحة شرف المنتدى
قريبا
موضوع: قصة عريس زااااااااااااااحف 
الأربعاء مارس 25, 2009 5:52 am
